కద్దనువారికి కద్దు కద్దని మొఱల నిడు

రాగం: తోడి
తాళం: ఆది
పల్లవి:

కద్దనువారికి కద్దు కద్దని మొఱల నిడు
పెద్దల మాటాలు నే డబద్ధ మౌనో ॥క॥

అను పల్లవి:
అద్దంపుఁ జెక్కిళ్లచే
ముద్దుగారు మోముఁ జూడ
బుద్ధి గలిగినట్టి
మానద్ద రావదేమిరా ॥క॥

చరణము(లు)
నిద్దుర నిరాకరించి ముద్దుగాఁ దంబురఁబట్టి
శుద్ధమైన మనసుచే సుస్వరముతోఁ
బద్దు తప్పక భజియించే భక్తపాలనముసేయు
తద్దయశాలివి నీవే త్యాగరాజ సన్నుత ॥క॥

కదలే వాఁడుగాడే రాముడు - కథలెన్నోగలవాఁడె

రాగం: నారాయణగౌళ
తాళం: ఆది

పల్లవి:
కదలే వాఁడుగాడే రాముడు - కథలెన్నోగలవాఁడె ॥క॥

అను పల్లవి:
మొదలే తానైనాఁడే - తుదిమొదలే లేనివాఁడైనాడే ॥క॥

చరణము(లు)
కల్పన లెన్నడులేఁడు సం - కల్పములే గలవాఁడు శేష
తల్పశయనుఁడే వాఁడు శ్రీ - త్యాగరాజనుతుఁడై నాఁడే ॥క॥